إحنا اللى روَّحنا بدرى بس مش أكتر
قول للى روَّح عشان يرتاح فما ارتاحشى
الراحة كلِّ ما تستعجلها تِتْأخَّر
واللى ها ينزل ها يُحكُم لو ما روَّحشى
قصر الرياسة بْبلاش، بسِّ انتَ مستخسر
قصر الرياسة ما فيش بينك وبينه كتير
فيه سلك شائك وكيس رملة وكُشْكِ غفير
لو جيت لوحدك، ها يضرب، والرقاب ها تطير
وان رحت مليون، ها يهرب، وانتَ تبقى أمير
رئيسنا واحد شهيد، يحكُم من التحرير
قصر الرياسة الجديد بِصينِيَّة ومدوَّر
بيحرقوها عشان تمشى ولا تمشيش
يا مصر عُمْرِ ما فيه ثورة تقوم بِشْوِيش
المُلك ده اللى ادِّتيه للعسكرى بقشيش
حقّ العيال اللى ماتوا فى طابور العيش
وبنت عَرّوها فى الشارع وشيخ أزهر
الصبح طالع لِقِى دبابة فوق راسُه
مربَّعة فوق دماغُه وكاتمة أنفاسُه
والشرق مقفول وخِتْمِ النِّسر ترباسُه
قام خبَّا شمسُه ووزَّعها على ناسُه
على العيال اللى ماتوا غدر وانداسوا
بقى شرق فى كل جسم، وشمس بتنوَّر
كان للفراعنة إله قرد وإله تمساح
وللإله كهنة وعسكر يقف بسلاح
وخزنة متقفِّلة بالضبة والمفتاح
وقصر يشبه قصور الجمهورية براح
يا عينى ع الآلهة بقوا فرجة للسياح
ياللى بنسر وسيفين فرحان ومتكبَّر
الشمس تُدعى الغزالة فى اللغة فاعلم
وبالغزالة المضيئة فى السما باحلم
غزالة ممكن تبيِّن طبعها الوحشي
ما تغرّكمش الأسامى ورقِّة المبسم
دى شمس واللى يِقَيِّدها ما يفلحشي
ومصر حالفة، ها تتحرر، هاتتحرر
هذا الفيديو من اخراج و انتاج حملة كن مع الثورة
كل الحقوق محفوظة 2012
ليست هناك تعليقات:
إرسال تعليق