كرامة المصرى تسوا عنده كتير نفسه يرجع كرامته والفساد يطير
شهر يناير يوم 25 اعظم تاريخ ثوره مصرية على مر السنين
شباب رفع راس مصر لفوق مش لابس طوق
عاوز حقوقه الشرعيه وطلبها بكل زوق
خدلك لفه ولفلف واتفرج فى ميدان التحرير
هتلقى وشك ابتسم قلبك قرب يطير
شباب فهم معنى الوحده اتحد عمل تغيير
قيمة مصر النهارده بعد الثوره اكبر بكتير
متخافيش يا بلادى فى عز المحنه اتحامى فينا
احنا ولادك رجالة نشيلك فوق روؤسنا و فى عنينا
جدى وجد جدى استشهدوا فيكى بيحموكى
مش ممكن يجى فيوم احفادهم ينسوكى ويرموكى
واقفين زى الاسود ايد واحده لاجل يحرروكى
فيه منهم اللى استشهدوا وبدمهم فادوكى
شكرا لكل شاب قال رايه من غير مايخاف
راجل من ضهر راجل خلى العالم بص وشاف
طول مافى فُرقة وفتنه هتضيع الحقوق
شوف اول ماتحدنا ايد واحده بقينا نسوق
مسيحى مسلم مثقف امى غنى وفقير
ضموا كل دول هتافهم فوق بعض اتحول زئير
حتى لو محققناش كل المطالب برضه كسبنا
كفايه ان العالم كله عرف مين احنا
ماهى الرجولة والاخلاق متبانش الا فى المحنه
كل البيوت بقت بيت واحد والله فرحنا
كرامة المصرى تسوا عنده كتير
مش عاوز ذل وظلم واهانه عايز تقدير
بلده عنده زى عرضه يخاف عليها يغير
نفسه يرجه كرامته والفساد يطير
بيطالب بالتغيير ايوه عايز تغيير
صابر لكن لو انفجرت هكون سلاحح خطير
لو نزلت ميدان التحرير هتلقى دوله صغيره جوه الدوله
دوله لو حد فيها خبط فيك هيقولك اسف
ولو حد عيز يعدى هيقولك بعد اذنك
ولو حد عايز يشوف بطاقتك هيقولك معلش احنا مضطرين
تسمع كتير كلمه حاسب عشان البنات تعدى
مفيش فيها معاكسه ولا تحرش
لمل المسيحى بيصلى المسلم بيحمى ضهره ولما المسلم بيصلى المسيحى بيحمى ضهره
هيا ديه مصر اللى احنا عايزينها
ليست هناك تعليقات:
إرسال تعليق